Varo po i Tambang dino manau-panau sid isan do tagad. Manjadi inot Mondow dino nga manau-panaui sinod isan do tagad. Manjadi miniringuvab no inot Mondow. It Tambang nga miringuvabi. O-hai, ka dit Mondow, O-hai, ka di Tambang. Korongou nopo dit Mondow dot miringuvab iti tambang , banal no ko asana ginavo dinot Mondow sampai boros dit Mondow “Nokokuro ka Adambang, tu monusui-ko dohon miringuvab?” ka dinot Mondow om kinamai no mongogusa inot Tambang ka. Na it Tambang dino kah soira ginusa yosido nga kinam no tumangkus tu, rumosiko atabpaan dinot Mondow om akan bogima yosido. Alaid no mangkus-tangkus ka inot tambang, nokorikot no yosido sid iso o sulap dot Tanakvagu. Kagi po ki azam inot Tanakvagu dot Kambing. Manjadi kemot nopo di kambing dot mangkus–tangkus it tambang, duatoi dot nokokuro. Boros di tambang , tumangkus oku ma diti tu gusaon oku dilot Mondow , ka di Tambang .
Pomoros nopo ka it kambing ka, “Kada ie korosi, gamko siti-ko dohon, tu tabangan ku ie ikau” ka di kambing. Manjadi minintoron no bo it Tambang dino sampai nokorikot it Mondow. Manjadi nokorikot po it Mondow dino ka pomoros no inot Mondow sinod kambing, “Nokokuro ka Adambing tu, onuvon nu ino Tambang ku” ka dit Mondow. Pangambat nopo ka inot kambing, “Nokokuro tu retan nu ko dikau do dinot Tambang, dot ong otopot no dohon do Tambang diti tu inazam ku laid” ka dit Kambing. Boros dot Mondow “Amu, dohon dino, alaid ku no pigugusa ino” ka dit Mondow. “Aik..banalko dohon ino, alaid-ku-no piaazam iti” ka di kambing. “Bang amu ko kasip ikau dino nga azamon kui tu, ipongoduvoku dit azam-ku dot Mondow ih”, ka di kambing.
Iri nopo Mondow ka banal ko akimozo manjadi pomoroso no ka vagu ka dau, “Nokokuro kagi ma tu baiko ikau om kapangazam dot Mondow”, ka dit Mondow.”Bang amu-ko kasip do kiazam-oku dot Mondow, na imatai kah silod pinosuvangan ku”, ka di kambing. Om pigagazad no kumaa sid talaga dot aralom po om banal ko oliou. Nokorikot-po siri , boros di kambing , ”Ba Odondow imatai no ka ilot rinuvang dot kandang Mondow ku, tu banal ko amu ko ma kasip doho”. ”Bang kosuvang ko no dara, ikau dino nga kumoduvo no dot Mondow ku”, ka di kambing. Oluhungai no ka bogima dinot Mondow ka sid rinuvang do talaga, nga banal-banal-ko varot nemot dau dot Mondow vokon sid rinuvang talaga dino kah dot baiko ondig-ondig dau.
Kemot-imot po ka dinot Mondow ka, antad no ko nokotigog ka om banal ko rumosi azamon yosido dinoyat Kambing sid saralom talaga dau. ”Atok, azam oku no dati diti”, ka dit Mondow om kinam no tumangkus. Suvai ko minintoron ong napagasan banal yosido, na nimot-imot ka bogima dau ino kara. Na irit nopo kara ka nimot po dau inot Mondow ka om banal ko napagasan padtangkus ka duato no dau, ”Nokokuro ko ka Odoondow tu banal ko tumangkus? Ka di kara. Ambato nopo ka dinot Mondow, ”Azamon oku dilot kambing, tu ipongoduvo dau dilot azam dau dot Mondow ih silot rinuvang do talaga”, ka dinot Mondow. ”Okonko Mondow iri, baiko ondig-ondig-nu iri”, ka di kara. ”Ino pogi miguli kito sori om patazo to i kambing”, ka di kara. Nilaan po ka bogima om baiko inakalan yosido dinot Kambing banal no ko ohungot banal inot Mondow. "Sumabak kono ong biano Adambing, akanan kikou di Adambang ong biano" ka di Mondow dot ogongus ogi ka tu banal ko humungot.
Manjadi miniguli no vagu ka it Mondow dot mazat-gazat dinot kara ka tu kinumogos-no sid iku dau, tu mahalan banal yadara mamanau. Minsosomok po ka sid sulap dinoyat tanakvagu ka inot Mondow notimpan no ka bogima dinot Kambing dot miniguli no vagu inot Mondow om kinam no ka mominsungal inot kambing ka dot tongirad do lingkut i tana dot osukab di tondukan dau. Kemot imot po ka di Mondow dot suvai hakang ka inot Kambing na kinam no vagu tumangkus ka inot Mondow tu rumosi banal ko atabpaan dinot Kambing dot azamon bogima yosido.Na irit nopo kara tu kakali mogos-kogos sid iku dinot Mondow ka minatai ih ka tu soira tumangus ka inot Mondow, kahid-kahid sirid ongo puun do kazu, sirid ongo kovotuan, sid ongo rugi dot govuton.
Na it sanganu dinot Kambing ka, mangaladtak-ladtak do parai. Na it nimot dit Mondow it tondukan-tondukon di kambing ka ong otopot no, baiko kurulu do parai it niada dit Tanakvagu sid manahambai do sulap. It Tanakvagu ka dino, soira nopongo mangaladtak dinoyat parai dau noluhungan no dau inot Tambang sid manahambai do sulap om onuvo no ka dit Tanakvagu it bilok dau om tokono no dau it tambang. Na it Tambang ka bogima baiko masai-kasai po tu mingkono no bogima, minatai i sondot bogima dinot Tambang.
Nompus Tangon.
TERJEMAHAN BAHASA MELAYU
Nasib Si Rusa
Pada suatu hari,Si rusa berjalan-jalan di tepi sebuah ladang.Kebetulan pada masa itu,Si harimau juga berjalan-jalan di ladang tersebut.Si harimau menguap,Si rusa pun menguap,
”O-hai” kata Si harimau,
”O-hai” kata Si rusa.
Si harimau melihat Si rusa turut menguap dan berasa marah lalu bertanya,
”Kenapa kau meniru aku menguap?”
dan dengan berangya Si harimau pun mengejar Si rusa.Si rusa,melihat akan Si harimau yang datang membahamnya,turut segera berlari menyelamatkan diri.Setelah lama berlari,Si rusa pun sampai di sebuah halaman sebuah sulap yang mana pada sulap tersebut terdapat seekor kambing peliharaan pemilik sulap tersebut.Melihat akan perihal Si rusa yang melarikan diri,ia pun bertanya kepada Si rusa,Si rusa pun menjelaskan perihal Si harimau yang mengejarnya.
“Jangan takut,malah marilah sini,akan ku tolong kau”. Kata Si kambing.
Si rusa pun singgah di sulap itu sehingga Si harimau tiba.Setibanya Si harimau di situ,ia pun bertanya,
”Wahai Si kambing,kenapa kau mengambil rusa kepunyaanku?”.
“Kenapa pula kau mengatakan Si rusa ini kepunyaanmu?Sedangkan Si rusa ini peliharaanku,”jawab Si kambing.
“Bukan,rusa itu kepunyaanku,sejak dari tadi aku mengejarnya.”Balas Si harimau lagi.
“Memang rusa ini kepunyaanku,sudah lama aku memeliharanya.kalau kau tidak percaya,kau juga merupakan peliharaanku kerana sudah lama aku ingin mencari pasangan harimauku”.Balas si Rusa lagi.
Si harimau berasa hairan lalu bertanya lagi,”Kenapa hanya kau yang mempunyai peliharaan harimau?”
Jawab Si kambing,”Kalau kau tidak percaya aku ada peliharaan Harimau,mari kita lihat tempatnya ku letakkan harimau itu”.
Lalu mereka pun berjalan bersama sama ke sebuah telaga yang dalam dan jernih.Setibanya di situ,si kambing pun berkata,
“Kalau kau tidak percaya,lihatlah dalam kandang itu harimau peliharaanku.Termasuk kau,maka ada dua lah semuanya”.
Si harimau pun melihat kedalam telaga tersebut dan ternampak seekor lagi harimau yang sebenarnya merupakan bayang-bayangnya sendiri.Terkejut dengan hal itu,si harimau pun terus berlari kerana takut akan dijadikan Peliharaan oleh Si kambing sehingga ia terserempak dengan seekor kera.
Si kera yang melihat akan perihal Si harimau yang berlari ketakutan pun bertanya,
“Kenapa kamu berlari?”
Si harimau pun menceritakan hal Si kambing yang ingin menjadikannya sebagai haiwan peliharaan dan juga hal kandang Si kambing. Mendengar penjelasan Si harimau,dia pun berkata
“Harimau yang kau lihat itu bukanlah harimau sebenar,tetapi hanya bayang-bayangmu. Nah,kalau begitu,mari kita kembali kesana.Kita bunuh si Kambing.”
Kedua duanya pun kembali ketempat Si kambing.Si kera pula mengikatkan dirinya di belakang Si harimau kerana malas berjalan.Melihat Si harimau dan Si kera semakin menghampiri sulap tersebut, Si kambing pun menanduk-nanduk tanah didepannya sehingga bagaikan sarang anai-anai tanah yang di tanduk Si kambing.Melihat hal itu,Si harimau pun dengan pantas melarikan diri,dalam fikirannya,sedangkan tanah yang begitu berat dapat diangkat, apa lagi dirinya.Si kera yang mengikatkan diri di belakang si harimau pun matilah kerana bergeser dengan duri-duri di hutan.
Sebenarnya pada masa itu,tuan si Kambing sedang menginjak padi,dan tanah yang dilihat oleh Si harimau itu, hanyalah merupakan resmi padi yang dibuang oleh tuannya. Setelah tuan Si kambing selesai menginjak padi,dillihatnya ada rusa di halaman sulapnya lalu dia pun mengambil lembing yang disimpannya dan membujak Si rusa.Maka matilah juga Si rusa.
Demikianlah cerita Si rusa yang malang, kesudahannya tetap juga mati.
IH LAAKI MONGUBAT DI YODUW SID PUUN RANGALAU
Varo iso kusai kah ngaran dau ie Laaki om it savo nopo dau nga Yoduw ka. Okuro ong lumohing ih ka aso tanak di Laaki om Yoduw. Na insan tadau, ponizud no kah ih inot minisavo dino sid iso o bavang dot banal ko aralom. Soira monizud-nizud kah yoti Laaki om Yoduw mad notimpan ie di Oduw inot rangalau dot aragang ogi sid tupak do bavang. Adih banal ko mansak kagi inot rangalau om banal ko tiakan Yoduw mirot-sirot dinot rangalau. Pomoros no ka bogima Yoduw sidi Laki savo dau “Kuvoon, onuvai oku po ka do rangalau mad tiakan oku ma banal” ka di Yoduw sid savo dau. “Songia ka inot rangalau boroson nu?” ka di Laaki. “Hodi ya” ka di Yoduw om tuduko no ka dau ino rangalau. Na ie laaki nopo kino notimpan dau it ondig-ondig dot rangalau sid vaig manjadi antaman nopo dau ong inot ondig-ondig do rangalau sid saralom vaig. “Pass!!” ka bogima dinot vaig tu tinumuhun no ie Laaki manganu dinot ondig-ondig rangalau nimot dau. Nga tinumulak po kah bogima ie Laaki banal ko humungot kakasan sid savo dau Yoduw. “Rangalau kanu bo om baiko sahap” ka di Laaki. “Ong ikau bo kuvoon, tutudukon ku hodi kangku silod tupak do bavang bo” ka di Yoduw. “O.. silod tupak bala bo” ka di Laaki. Na ih Laaki om Yoduw ka dino tinumupak no dinot bavang tu manganu no do rangalau bogima.
Nokotupak poh kah, minomoros no ih Laki sid savo dau ka “Ino bino kuvoon tu banal ko tiakan ko banal na sungangon kikau pindakod” ka di laki. Na sinungang no ka bogima di laki tu osinang-osinang po bogima kindakadan di Yoduw. Soira nokindakod Yoduw ka minongupu no ka dinot uva do rangalau nga mad notimpan ih ka di Laaki it papangan di Yoduw do kiraha ogi antaman nopo ka bogima di Laaki om nonukaan Yoduw dot baiko navaraan ka Yoduw di hiza dino. Kodimo no ka bogima di Laaki ih Yoduw pendahu ka dau “Oduw, indahu po kah mad nonukaan ko ma dino” ka di Laaki. Nokindahu po bogima Yoduw ka pogomo no di Laki ka om apatus ogi ka ih Laaki mogihim ponopis. Nokimot poh ka ponopis, tutuvo no dau ino ponopis ka om potopison no dau sid papangan di Yoduw topot okuro ong topisan noka di Laaki ka varo ih raha sumoliu. Alaid ka bo gima ie Laaki om Yoduw mitopis-topis.
Kagi po, varo Tanakvagu banal ko avantang ko minitalib sid pinitopisan di Laaki om Yoduw. Nimot-imot ka dit tanakvagu om duato no dau ih Laaki om Yoduw, “Monguro-nguro kou ka dino Ambaza” ka dit Tanakvagu. “Adih, mongubat oku bo diti papangan di Yoduw diti tu nonukaan” ka di Laaki. “O.. Yadkino bala bino” ka dit Tanakvagu. “Na ka tudukai kikau kuran mongubat dinot nukoh dau” ka dit Tanakvagu om kizu-kizuai no ka dau ih Yoduw. Nopongo po kah it tanakvagu mongizu-kizu di Yoduw pomoros no ka ih Laaki sid tanakvagu ka “O..yadkino ka bala mongubat” ka di laaki. “O.. yadkino no bino” ka dit tanakvagu. Na ka yoku po ka di Laaki om minovoli no ka bogima manampak di Yoduw. It tanakvagu ka dino minuli no kah ong yosido nga ih Laki om Yoduw dit sampai minsosodom ih ka nga kakali ih sid puun do rangalau. Na ka di Yoduw “Muli kito no kuvoon tu mod sumodop no banal” ka di Yoduw. Kimot po ka bogima om osodop no na minuli no bo yoti Laaki om Yoduw. Okuro ka ong sid panahon ka nga kakali mongubat ih Laaki.
Na nokorikot ka sid valai dit osodop no nga kakali miubat yoti Laaki gamko oguzu-oguzu song binatang. “Adih Laaki, monguro-nguro kou ka dino oi mad oguzu banal ti valai” ka dit ongo ulun. Ambato nopo kah di Laaki “Mongubat oku bo di Yoduw diti oi” ka di Laaki om agara ogi ka tongulun momongirak momongogauk dioti Laaki. Turu tadau om turu sodop ka yoti laki miubat ka om ka di Laaki “Intaran-taranan po bo bino mongubat Oduw” ka di Laaki sidi Yoduw. Yoduw dino kah minogontizan no ka bogima om norikot po kinosuvan ka amu no banal ka otoron ih Laaki ka tu amu insan kimot dau lumandai ot tanak baiko tinulungan dot tulun ka mongusu ih Yoduw om “ngaaaa” ka bogima tu nakalandai no tanak di laaki dot gapid ogi Kusai om Ondu tanak dioti Laaki. Banal ko ohigak bogima ginavo dioti laaki tu nakadapat ogi dot tanak.
Na it tanak dioti laki om yoduw ka makin lumaid makin gumazo no. It anak do kusai kah banal avantang ka om iri nopo tanak ondu nga suvai banal ko avasi. Gamko intutuk-tutukan po Momodsuni om Tanganakvagu kah inot duvo miobpinai. It ongo ulun vokon sino kah songburung-burung mongolimut dioti Laaki om Yoduw, ka dioti ”Araat pomurasan molohing nga anganak dau nopo om banal ko avasi om avantang” ka dioti. Na it Vozoon ka sino dino ki anak dot Kusai om Ondu ka om mamaih avantang om avasi ka gamko inot anganak dau nga banal ko monongkingin dinot anganak di Laaki om Yoduw. Soira sumorid tagad ka it anganak di Laaki om Yoduw antad noko tulungan dinot anganak dinot Vozoon. Na it hal dot kianak dot avasi om avantang ka ih Laaki norongou ka dit Tanakvagu minomudut di Laaki sid pomogunan vokon. Rumikot no ka bogima tu mangakun dinot anak dioti laki dino ka dot anak dau topot it anganak dinot ka banal ko amu mangakun inot Tanakvagu dino molohing dau gamko sinunsub antad sino. Topot amu kakakun ka it Tanakvagu taraat gamko kumipatai o sondot kinginan ong amu itahak dang dau tu yosido kino kisavoo no nga amu maganak it savoo dau. Miitkit ka bogima do dangol tu mamatai no yosido topot it anak kusai di vozoon ka tu banal ko apapag ka insan no vakasai dau om pogigili no dinot tanakvagu tu nahadan no. Nogulian po ka pangoduat no ka inot anak do vozoon do kusai "Ba sumurung ko po" ka dau. "Amu no biti" ka dinot Tanakvagu it minangaraat dioti Laaki. Na nimot po ka di Vozoon om yadkino amu kinginan dau it ongulun sinod binatang dot amu otoron tu momodrosi ong miguli vagu it Tanakvagu taraat ka, na minomoros no ka inot Vozoon ”Okuro kino Laaki ong pisovoon to inot anganak dikito tu ong kopisavoo no yoti, na banalko sokovai sitid pomogunan ku dohon no sanganu om amu obulun rumikot vagu yalo rumikot vagu siti” ka dit vozoon. Ambato nopo kah di Laaki ”Ombo no ko ikau bino Aman, pisovoo nopo yoti ahat dinot anganak nu” ka di Laaki. Na pinisavo no ka bogima inot anganak dioti Laki om yoduw om ih Vozoon. Ihiza minogontong no it tanak dioti laaki ka turu tadau om turu sodop om niahas ogi tulun. Na it Tanakvagu taraat ka dino banal ko upus om amu obulun dau mongusasou umpug sirang dot ulun to nokuasa no ngoviai dinot vozoon sino.
Pengajarannya :
Orang muda yang hendak khawin perlu belajar dulu ilmu bagaimana hidup sebagai suami isteri terutama berkelamin. Orang lemah minta bantuan jangan ambil kesempatan dalam kesempitan tetapi ajarlah dengan sebaik-baiknya. Jangan suka merendah-rendahkan orang jika berkekurangan, tidak cantik dll.
Catatan:
Cerita ini merupakan cerita lawak jenaka dan berbentuk XXX 18 tahun keatas sahaja.. Cerita ini merupakan cerita benar pada zaman dahulu kala dan ianya merupakan cerita hiburan semata-mata pada zaman itu. Dalam penceritaan ini, watak si Laaki boleh dikatakan lebih kurang ceritanya macam ongkol-ongkol yang lebih kurang lucunya cuma yang ini ada unsur XXX nya. Cerita ini juga mempunyai persamaan watak dengan Pak Pandir, Pak Kadok dan Lebai Malang dalam cerita sastera Melayu. Semoga terhibur dengan cerita ini. Sekian dan terima kasih.
IT MONDOW OM IT SONIT MINGUT MITAWUN-TAWUN
Insan tadau kah sid iso o govuton nokopisamung no inot Mondow om it Sonit. Na ino tu osusa banal kakakanan ong sonit na minongitung no ino Mondow om nokitung no yosido dot iso ot takal. Minomoros no yosido sid ginavo dau do ka ”Adih okorup dati Yodonit diti ong tunuvan” ka dit ginavo di Ondow. Pomoros no ka inot Mondow sidi Odonit ka dau, ”O Ambaza, na ka mitawun-tawun kito” ka dinot Mondow. Na inot Sonit tu kilo banal ka dinot kobuatano do Mondow ka minangakun no bo yosido. “Ikau pobo gulu dino Ambaza” ka di Mondow. “Oboh” ka dinot Sonit. Untunai no ka bogima di Mondow ino Sonit. Ongo sahap, kazu opodok agazo no ponguntung dinoya sonit. Na ino sonit ka, soira monguntun-nuntun do tutudan dau kah ino Mondow, minongukud no do tanah Yodonit tu milivung sumurid bavang mongoi do vaig ka. It ongo vaig nongoi-ongoi dau ka izopos dau sid ginilion dau ka. Na pongondim no ka bogima inot Mondow tu rumosi ko mangakal mogidu Yodonit ka “Sino ko ie Odonit?” ka dinot Mondow. Ambato nopo ka dinot Sonit “O.. Siti ie oku bo diti Odondow” ka dinot Sonit. “Ba mobputik oku no ma diti, intahan no” Ka dino Mondow. “Oboh bino Ondow” ka di Odonit. Na tutudai no ka di Mondow ka inot inumpug dau dot avun. Soira novuvu ka ino yat apui panavahan no ino Mondow, “Sino ko ih Odonit” ka dinot Mondow. “O.. Siti oku ie boh Ondow” ka dinot Sonit. Na inot Mondow ka banal ko ovongo kuran kinoposizan dinot Sonit imatai noka dau tu amu kasip nga banal-banal ko amu minatai ino Sonit. Pongitung noka bogima inot Mondow “Ong amu minatai Yodonit jadi yoku dati ino nga amu ie matai” ka dit itung dinot Mondow. “Na ikau po bino Ambaza” ka dinot Sonit ka. Gikol no bogima inot Mondow.
Na pogihim no ka bogima ponguntun dinot Mondow ka inot Sonit om tutudai no dau inot Mondow ka. Modung-vodung noka bogima kino tutudan dinot Mondow om ningkono po diri ka. Soira novuvu ka inot avun ka, imatai no dinot Sonit ka nga baiko tulang po inot Mondow. Onvo no ka bogima dino sonit ino tulang do Mondow ka om gamao no do Sundatang. Ponundatang po ka Yodonit ka orongou no ka dot uni dau do yadkiti “KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN” ka. Na ipat tadau no ka bogima monundatang inot sonit ka. Insan tadau, norongou dinot ongo kara ka. ”Avantang mang ino sundatang do sonit oi” ka dit ongo kara. Na norongou dinot anak do kara, ”Idi gamaai oku po kah sundatang yadko ilo do sonit” ka dinot anak do kara. ”Oboh” kada dit tidi do kara do minomudut. Soira minodop inot sonit ka takaho no ka bogima dinot tidi do kara it sundatang dinot sonit patahako ogi siriyad anak dau. Soira nanu dit anak kara ka ponundatang no yosido ”KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN”. Suvai nokotungang om nokotigog ka inot sonit mining-ining dinot tuni om imatai dau it sundatang dau aso no, natakau no do kara. Panavahan noko inot Sonit tu amu kindakod ka yosido tu mindamo dino Sundatang dau ka ”Adih Adara, ino ma sundatang dino oi doho dino. Nokokuro tu tinakau dikou” ka dino sonit. ”Kada pomudut sino ka sino Odonit, iti sundatang diti di ahat o sanganu diti” ka dinot tidi do kara.
Na sisiri nod puun monggis ka inot Sonit dot banal ko olungui om upus banal ginavo dau dinot Sundatang dau. Kagi po minitalib ka inot Tongkuzu om nimot no dau dot banal ko olungui om osusa banal ka ginavo dino Sonit. Osianan ka bogima inot Tongkuzu, ”Nokokuro ko ka dinot Odonit tu banal ko olungui om osusaan ko banal ginavo?” ka dinot Tongkuzu. ”Isakah amu olungui oku ong silod savat ilo Sundatang ku tu tinakau no dilot ongo kara” ka dinot Sonit. ”O.. yadkino bala bino” kadi Tongkuzu. ”Kada kosusa botoh ginavo, tulungan kikau manganu dinot Sundatang nu” ka dinot Tongkuzu.
Na minindakod no ka it tongkuzu dinokah dot odoromoi ot gama. It tanak do kara kino magavi no banal monundatang, ka dit tuni dau "KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN" ka. Na momosomok poh kah it tongkuzu nopurasaan no dinot anak do kara ka om pongoduat no sid tidi dau. "Idi, nunu kino muyumang-kuyumang dino" kad dinot anak do kara. Ambato no ka dinot tidi do kara dino dot amu no siniratan dau "Adih Gung-guung d’yonggison bino ahat" ko dinot tidi do kara. Na noronggou po ka vagu dinot anak do kara amo yadkino pangambat dit tidi dau, minonundatang no vagu kah yadara. "KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN" ka dit tuni sundatang. Na nimot po kah dinot anak kara om osomok no banal ino tongkuzu kah, minongoduat no vagukah sid idi dau. "Idi, nunu kino muyumang-kuyumang dino" kad dinot anak do kara. Ambato no ka dinot tidi do kara dino dot amu ih siniratan dau vagu ka "Adih Gung-gung D'yonggison kangku bino ahat" ka dinot tidi do kara. Na noronggou po ka vagu dinot anak do kara amo yadkino pangambat dit tidi dau, minonundatang no vagu kah. "KOU-KOU TULANG D'YONDOW MINGUT MITAWUN-TAWUN YOSIDO KO NO TOWUNAN" ka dit tuni sundatang. Suvot po kah dinokah, nokorikot poh ino tongkuzu ka om onggipai no dau ino tontoluw d'yadara ka om "Kisak, kisak..." ka dinot tanak do kara om "Pobo!!" ka sid puun do monggis ka tu naratu no yosido. Antad noko nababak ka ino tulu tanak dinot kara. Na it Sonit ka dino rumikot no sinod anak do kara naratu tu manganu no dit sundatang dau. Irit tongkuzu nopo kah nonggipan po daukah antad noko minurus mindahu sid puun do monggis. Monorima kasih oku sid dikau Ambaza tu tinulungan oku dikau ka dit Sonit. Miabal ih bino ka dit Tongkuzu. Na it kara ka soira nimot dot minatai it tanak daukah inihim no dau Yodonit om ie Tongkuzu topot suvot poh kah alaid no mininsava tu minozo no dit murulun. Antad dit tadau diri kah it Sonit om it Tongkuzu banal ko mikoruhang topot ong it Kara kah banal ko mipatai tantu ong kopisamung.
IT TANAKVAGU OM IT ENUVUNG DO POTIZUKAN
Iti no tuturan do kodori soira sumusul dit koposizan momogun dih gulu. Na siti varo iso tanakvagu kah banalko ozi banal dot manapu do potizukan. Okuro ong opu-opu o puun monggis do potizukan om banal ko asavat kah nga indokodon ih kah dau. Insan tadau minamapak no ka inot tanakvagukah dit osopungi dinot puun monggis topot okuro ong minsosodopi kah kakal amu korikot dit raan gininiton dit ongo potizukan. Nah inintaranan no boh dit tanakvagu mamapak kah tu minsosodop no banal. Sondiu no ka yosido om pomurikit no do tapui. Na hiza po kah dit orondom no, ti vondoi no dot bulavan o binatang kah gamko yosido dinokah sirid sunsud ogi yosido. Soira yadkino ka banal ko ovongo inot tanakvagu kah tu it kinorikatan dau sino nga baiko govuton om mad nopo nga bulavan ogi o binatang. “Adih ka dit ginavo dit anakvagu, valai dati do rogon iti” kah dau. Na nokitung no it tanakvagu dot mogidu anatad sino topot nokitung ih yosido dot ong okon ko rogon isai ma mintoron.Ingkakat no ka yosido sid puun do tukad om poinggogongou no ka yosido. “O Amai, Kindakod oku” ka dau nga aso ih mumbongut. “O Inai..Kindakod oku” ka dit Tanakvagu nga aso ih mamabat. Pongodim po kah vagu yosido “O Adi, Kindakod oku” ka dau. Na norongou no ka dau dot “O indakod no ka”. Indakod no ka inot tanakvagu kah om nimot no ka dau dot ogumu ogi tulun mintoron sinod binatang kah. Na it minangambat dau dino kah banal ko avasi ka inot Enuvung gamko inahak po kah diri yosido dinot Enuvung pogom. Sokoviai it ongo ulun sinokah banal ko monginin dit nunu nopo it ih suhuu dit enuvung ka dino. Na minomoros no ka it enuvung sid tanakvagu dino “Nakakan ko no ka dino Adi” ka dit enuvung siriyad tanakvagu. “Amu po” ka dit tanakvagu. “Ong yadkino pakanon po dahai ikau” ka dit enuvung ponuhu no yosido dit ongo ulun vokon sino. Surungai no ka yosido dot tongo akanon topot it ongo akanon noko surung sino dino kah it kana om pinoko ginazau sid kazakap dino anak om tontolu do potizukan. Om iri nopo vaig kah antad do pahaa do potizukan. Na minongoduat no ka inot enuvung “ nunu kah ong iti diti?” ka dit enuvung. Na ambato nopo kah dit tanakvagu ”amu ilaan ku nunu ino” ka dot baiko minomudut yosido. ”Om iti, nunu iti?” ka vagu no dit Enuvung dot piokiit dau it paha do potizukan. Na minomudut no vagu ka it tanakvagu ka dau ”ino nga amu ih ilaan ku” ka. ”Banal bo amu ilaan nu?” ka dit enuvung. ”Banal” ka dit Tanakvagu. ”Na ong yadkino akaan no bo toh” ka dit enuvung. ”Amu akanon ku ong iti tu amu kopimot oku” ka dit tanakvagu. Na soira do noboros dit tanakvagukah om amu mangakan oku ka, sinurungan nobo dit enuvung banal ko avasi dino kah dot ginazau, kana do sada om vaig na minakan no bo ino tanakvagu dino kah nopongo poh kah monginakan kah it tanakvagu, minomoros no it enuvung ka dau ”ikau diti okon ko mad ko riniba vokon manjadi polobuson no dahai ikau” ka dit enuvung do potizukan. ”Yadkiti okoi ma diti tu kogumui dit ongo ranzat za avi dit ongo riniba mangakan om minghuzas dit ongo valai za. Na inot tu amu ngoviai yadkino riniba na amu nobo murokuro okoi dikau” ka dinot enuvung do potizukan. Anuvo no ka dau it kazakap do minit-ginit om iri yat tumpung om izanai no dau do anak om paha do potizukan. ”Onuvo no iti topot soira dot anavau dit minsusuvab minsodu ko no antad siti” ka dit enuvung. ”Oboh, yadkino no bo dino” ka dit tanakvagu.
Na hiza po dit minsusuvab om amu po anavau kah poringpihot no ka inot tanakvagu om pamanau muli minsodu dinot bulavan binatang do potizukan. Topot poh kah anavau po notimpan no dit tanakvagu antad sid sodu tihuzas no ka inot ongo binatang om nulit om kumuro kah tinizonon dit potizukan. Na minamanau no ka muli it tanakvagu. Soira nokuli sid pomogunan dau ka, binahagi-hagi no ka ino nongoi dau. Om tinoturan no ka dau o nunu navazaan dau soira ihiza minamapak sampai ih kinosomungan dau dinoyat enuvung do potizukan. Na norongou kagi dih Ongkol-ongkol. ”Adih, Ambaza amu ilo ko mangambat ongo ikau” ka di Ongkol-ongkol. Imatai ka pogi ong yoku sumori ogumu adapatku paha om anak potizukan tu ilo mangambat ong yoku” ka di Ongkol-ongkol.
Osopung poh ka Yongkol-ongkol minamanau no ka. Nimot po ka dau dot iso o puun monggis om papakai no ka dau. Mad no ka it tanakvagu, soira amu navi dau mamapak na miniringodop sirid puun monggis. Suvot po ka dinot, orondom po ka povovondoi dot bulavan o binatang. Na yongkol-ongkol dino kah soira mongodim mokiindakod na kinodim dau it enuvung potizukan ka dau “O Adi kindakod oku” ka dau. Na inambat po ka diri bo gima dit Enuvung. Na nahak po kah dit enuvung pogom, sinurungan no bo dau do Paha om anak do potizukan om dinuat no dit enuvung yi ongkol-ongkol nunu ino. Na yi Ongkol-ongkol tu banalko mokimamaha inambat nobo dau dot ka dau “Adih Paha om Anak Potizukan ino” ka dau om amu po noboros di enuvung paakan kah minakan nobo yi ongkol-ongkol. Suvai rual om hungot ginavo dinot enuvung potizukan kah mimot-imot dinot kobuatano dih ongkol-ongkol ka om iduanai no ka dau yi ongkol-ongkol. Na yongkol-ongkol diti tu banalko mokimamaa, amu milod ikum om araat o ginavo kah avangaan ka tu okonko tinahakan yosido do paha om anak do potizukan ka gamko iniduanan ogi yosido. Minanavahan no ka yi ongkol-ongkol, ”Tahakai oku po kah dit paha om anak potizukan dikou Adi” ka dau. Ka dit Enuvung Potizukan “Uli no amu kuokuozon za ikau ka” dit enuvung potizukan. Topot yi ongkol-ongkol tu banal ko araat ka minimoros no yosido ka dau “Oboh, ong amu tahakan oku dikou tutudan ku iti valai dikou” ka di ongkol-ongkol. Norongou po kah dit enuvung potizukan ka om yadkino boros di ongkol-ongkol pomoros no ka yosido “Ikau no riniba banal ko araat. Ino tu yadkino boros nu na intahan no” ka dit enuvung potizukan.
Na it sid pomogunan di ongkol-ongkol ka, song binatang humongkob ka tu amu po nokuli-uli yongkol-ongkol. “Na ong yadkino ihimo botoh ditokou” ka dit tanakvagu. Ihimo no ka dioti yongkol-ongkol ka. Soira nokorikot sid puun monggis, suvai nokotigog ngoviai it ongoulun mogihim di ongkol-ongkol ka tu sid savat raan do monggis yongkol-ongkol do mamparampai no. Na ponguvun no ka do tapui inot ongo ulun dit nokorikot sino ka om indokodo no dit tanakvagu ka tu mongoi no ka bogima di buntung di ongkol-ongkol sid raan do monggis. Nokindahu po ka, nimot noko inot inan di ongkol-ongkol dot noponuan do singot do potizukan. Lopoto no ka dit tanakvagu inot buntung di ongkol-ongkol do lambagan do kazu om kakato no ka bogima dioti om nokorikot po sid binatang polobongo no ka dioti tu min
